عودة بعد غياب طويــل

السلام عليكم ورحمة الله وبركاته
طبعاً كانت فيه فترة أمتحانات طويلة الأمد .. ولأول مرة تمتد لفترة 3 شهور متتالية....
حمد الله على الأجازة ...
وبإذن الله تعالى ناوية على شغل جامد في المدونة ..
وهيكون فيها بإذن الله شغل خااااص بالدراسة عندي .. وبعضها متنوع ..
من كل لوووووون


والسلام حسن الختام

وماذا بعد الهجوم على غزة....!

هناك ما يحيرني في الآونة الأخيرة ..

وبعد الهجوم الشرس على غزة وموت أكثر من ألف وخمسمائة شهيد بكافة الطرق المحرمة في الحروب وجرح أكثر من خمسة آلاف غزاوي غير تشريد المئات منهم ..

ومحاولات أجتماع رؤساء العرب أكثر من مرة والذين كانوا يستنكرون الأعمال الإرهابية على غزة ...

ولكن بعد كل ذلك..

وبعد توقف اطلاق النار من كلاً من الطرفين ..

هل سيرضي العالم بما حدث في غزة ؟

وماذا سيفعل العرب وماذا ستكون ردة فعلنا على ما حدث هناك ؟

هل اكتفينا بأن تسيل دماء العرب أنهاراً وبمجرد وعد سخيف من دول ليس لها علاقة بفلسطيـــــــــــــن ولا بشعب فلسطيـــــــــــــن وتدخل لتأخد تعهد بوقف إطلاق النار؟


والغريب في الأمر أننا تناسينا ما حدث هناك ؟

ليس في أيدينا إلا أن نقول

حسبنا الله ونعم الوكيل

أبوَّة مقنعة ..

فيه شيء محيرني أوي أوي ..

فيه آباء بيبقي مسافر برا بلدهم .. وبيسيب أولادهم في البلد اللي هما مقيمين فيه .. أحياناً بيسيبوهم مع زوجاتهم .. وأحيانا بيبقي لوحدهم أو مع أهل الأب أو أهل الأم ...

وقتها الأب مش بيفكر إلا في نقطة واحدة بس ..
القرش .. أو لقمة العيش ..
طيب يا سيدي الفاضل .. بعدما عملت اللي أنت عايزة وكوشت على فلوس كتير أو حتى مجمعتش مش فارقة .. ممكن تجاوب على سؤال لو سمحت ......
أنت بعد العمر دة كله ... شايف تعامل أولادك معاك إزاي؟؟!!!


طبعا مش عارف تجاوب ...

للأسف أنا أجاوبك ..


أولادك بيبصولك نظرة واحدة بس.. أنك مصدر القرش اللي هما بياخدوه .. أو مصدر الفلوس .. غير كدة مفيش
لأن وبمنتهي البساطة .. حضرتك مربيتهمش .. ومتعرفش بيحبوا إيه أو بيكرهوا إيه؟؟
بكل بساطة .. أنت كانت كل معرفتك بيهم الفلوس اللي بتبعتهالهم في أول الشهر .. والتليفونات اللي بتقضيها تسألهم عاملين إيه؟...
ومهما كترت الإتصالات دي .. للأسف أنت متعرفهومش ..


بقي بالله عليك دي بقي أبوَّة ..

نسيت ... أيوة أيوة ... نسيت الشهر من كل سنة اللي أنت بتقضيه معاهم ...
صح .. علشان أبقي عادلة ..
بس بالله عليك.. مش كنت بتلاحظ أنهم بيعاملوك حاجة وبيعاملوا الناس القريبين اللي كانوا معاهم حاجة تانية ..

عمرك ما لاحظت دة ...؟!!!

يا قوة قلبك يا أخي ..

بجد أنا مش عارفة أقولك إيه!!!!

بس بجد نصيحة من بنت ليك ....حاول تجمع اللي أنت فرطت فيه السنين اللي فاتت وحاول كلامي ميكونش مجرد كلام والسلام وحاول يبقي نقطة بداية جديدة في حياتك وحياة ولادك ...
علشان هما بجد محتاجينك كأب .. ينصحهم ..
محتاجينك كصديق.... تسمعهم
محتاجينك كصاحب .... محتاجين حسَّك معاهم في حياتهم ..

فياريت متكونش أناني وفكر في عيالك ولو لمرة واحدة في حياتك

وداع مؤقت وأرجو من الله ألا يكون الأخير ..

إلى أحبتي في الله ..
أنا مسافرة إن شاء الله النهاردة ...
ومش عارفة هغيب عنكم أد إيه .
بس اللي أعرفه كويس أنكم هتوحشوني جدا .. وعمري ما هنساكم ..
وربنا يكرمكم يا أحلى أخوات عرفتهم في حياتي كلها ..

ربنا يجمعني بيكم على خير إن شاء الله

أستودعكم الله الذي لا تضيع ودائعه
في أمان الله


لا إله إلا الله

بااااااااااااك تاني للتدوين

إن شاء الله أبتدي التدوين تاني بعد غياب طويــــــــل أوي أوي ووحشني جدا التدوين ..

وحبيت أن رجوعي أهني كل الناس بشهر رمضان الكريم .. أعاده الله علينا بالخير وجمعنا في رحابه

كل عام وأنتم بخير وربنا يتقبل مان إن شاء الله 

تاج من حبيبتي في الله...

وصلتني رسالة من حبيبتي في الله دارين ( عاشقة الأقصي) بتقولي فيها على حملة التيجان اللي مغرقة الدنيا ... منظرها لسه واصلاني :D

عجبتني أوي الفكرة دي .. 

وأحب أنول شرف أني أخوض تجربة زي دي .. ,اكون أد الشرف اللي دارين أديتهولي ..

س1 : أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟

رغم صغر سني إلا أني مش عارفة أجاوب على السؤال الأول ..

بسم الله 

الأول:- حلمت وأنا لسه صغيره أني أبقي دكتورة وألبس البالطو الأبيض وأحط السماعة على كتفي وأمشي في المستشفي .. دة كان حلم طفولي أوي ولما كبرت عرفت أن أحسن حاجة أنك تعالج مريض مش أنك تلبس بالطو وخلاص .. لازم أكون على قد المسولية اللي أنا قبلتها .. وأن علاج مريض وأننا نشوف بسمة على شفاه أحسن من أي حاجة تانية 

التاني:- حلمت أن دراستي تبقي أكبر من كوني طبيبة أو دكتورة .. كنت ناوية أكمل دراستي في بريطانيا .. بس عرفت أن الدراسة في مصر مساوية وتكاد تصل في دراستي لراسة المواد خارج البلاد .. وبعدين أتبهدل ليه وأتشحطط برا بلدي ليه .. كفاية اللي أنا عايشاه اليومين دول وكفاية أني أكمل دراستي وأجري على بيتي وأقعد في حضن ماما باقي حياتي .. يكفيني القدر دة ..

التالت:- حلمت إن بمجرد دراستي أجري على بلاد برا وأهاجر من مصر وأشوفلي بلد غيرها .. بس برده لما كبرت بجد عرفت أن البلد دي جميلة أوي .. جميلة بناسها وأهلها بميتها وسماها بكل حاجة فيها .. وأحلى حاجة فيها طيبة أهلها ومهما دورت على بلاد تانية مش هاعرف ألاقي أحسن منها بلد .. والفكرة دي حاليا مرفوضة من ناحيتي رفضا تاما .. لأني أقدر أعمل حاجة وأقدر أرفع من مصر معايا

الرابع :- كانت من أحلامي أني وأختي الكبيرة تبقي أحسن من كدة وأعاملها أحسن من كدة .. بس النقطة دي بالذات متوقفه عندي علشان أنا مش عارفة أتصرف فيها صح .. وبرده بيرجع لغلط عندي .. والحاجة دي بتضايقني جدا وخاصة أني مش بحاول أصلح علاقتي بيها 

الخامس :- من أحلامي برده أني أعرف تفكير الناس أزاي وأحاول أوصل لنقطة واحدة ..أعرف الناس عاداتهم وتقاليدهم إزاي .. بيشوفونا إزاي.. وأحاول أوصل للناس  أننا العرب نقدر نبقي إيد واحدة ونقف قدام أي ظالم ونقوله إحنا مش هنسمحلك تعمل كدة ... نفس الفكرة متوقفة حاليا .. مش لأستحالتها .. لصعوبتها وأنها تحتاج أكتر من واحد .. مش واحد بس..

س2 : أذكر خمس أحلام على الاقل ..تخص مستقبلك؟

الأول :- عايزة أخد اشهادة اللي مغلباني دي وأبقي دكتور فعلا مش لقبا :D
التاني:- أشتغل في السعودية إن شاء الله يا رب العالمين سنة أو سنتين بالكتير أوي وأرجع تاني مصر 

التالت :- أرجع أساهم في عيادة أو أشتغل في عيادة.. 

الرابع :- لو ربنا كتبلي عمر يبقي عايزة إن شا الله أعالج الناس بأسعار رمزية بدل ما ضهريهم بيتكسر من دكاترة العلاج الطبيعي ..

الخامس ودة نفسي أحققه قريب .. أعمل حج زي ما بابا وعدني ((( ربنا يكتبهالي)))

س3 :أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا؟
الأول :- كنت أتمني أن جدي (( والد ماما )) كان يبقي موجود .. كان بيقولوا عليه واحد تقي ويعرف ربنا كويس ..وعمره ما أتقال في حقه كلمة وحشة .. ويكفي أن أي حد يفتكره بيقول الله يرحمه ..

ومش عارفة أقول التاني مين... مش عارفة ... 

بدأت تدون من امتي ؟ و دخلت العالم ده ازاي ؟

التدوين .. العالم المجهول الهويات لحد دلوقتي .. دخلاه تقريبا من حوالي شهر بس (( صغيرة أوي في عالم التدوين .. بس معلش ))

إزاي بقي .. أوك

حصلت مشكلة مع أصحابي على المنتدي .. وكرهت دخوله مؤقتا .. حبيت أبعد عن الجو دة شوية .. وإني أملأ الفراغ اللي سابه تركي للمنتدي بمدونة من كتاباتي الخاصة .. بس برده مفيش حاجة تغني عن الصحوبية اللي بجد  :D.. 

ايه كان انطباعك في البداية ؟

كنت مستغربة العالم دةوحسيت أد إيه الواحد صغير أوي والدنيا كبيرة اوي من حواليه ... حبيت أندمج في العالم دة أكتر وأكتر .. بس مطولتش كتير 

مين اكتر واحد بتهتم بتعليقه علي بوستك الجديد ؟

يبقي حرام عليا أقول واحد .. الموضوع بدأ بـ 2 .. أخواتي في الله .. وهما عارفين نفسهم .. رغم أن واحد منهم مش بيدخل على المدونة إلا نادرا .. بس بعتز كوني أعرف أخ زيه ..

ايه أهم حاجة اتعلمتها من عالم التدوين؟

سيب اللي قدامك يعبر بوجهة نظره ويقول رايه وكل واحد هيستفيد .. بجد تحفة 

ايه أكتر حاجة كرهتها؟

الخوف اللي الناس فيه .. وفي الأغلب اللي بكرهه أوي أني بحس أن ناس كتير بقوا لوحدهم في الدنيا ومش لاقيين اللي يفضفضوا معاه علشان كدة عملوا مدونات :D

حاسس ان التدوين له تأثير؟

طبعا .. تأثير سلبي جدا .. لأني بعدت عن الكتابة بسببها .. مش عارفة بس تقريبا حذر أكتر منه خوف :D

ما شعورك تجاه حملة الدنمرك الصحفية تجاه النبي صلى الله عليه وسلم؟

يااااااااااااااااااااااااه.. سؤال بقاله كتير متسألش .. 

بكيت .. بكيت أوي لما عرفت أن الرسول صلى الله عليه وسلم يهان وأحنا واقفين من غير ما نعمل حاجة وتكتم إعلامي رهيب على الموضوع كإنهم مش عايزينا ندافع عنه .. صعب عليا أوي أن الرسول صلي الله عليه وسلم ضحى بحاجات كتير وأوذي علاشن الدين دة وفي الأخر أقل حاجة نعملها مش عارفين نرد الإساءة.. حسبي الله ونعم الوكيل

- ما الذي ستفعله تفاعلاً مع محاولة إهانة حبيبك عليه الصلاة والسلام؟

اللي في إيدي كطالبة واللي من خلاله أقدر أعمله .. 

أول حاجة المقاطعة .. الحاجة اللي هشتريها دي مش هتحييني .. مهما كانت إيه .. وبحاول على قد ما أقدر أني أقلل من الحاجات اللي بشترها مستوردة .

التانية .. شباب زي الفل .. قمنا عملنا جروب على جوجل .. اسمه جند الأسلام .. كنا عايزين نحرك شباب المسلمين في كل حته في الأرض .. أحلامنا كبيرة .. ونفسنا نحققها في يوم 

التالته .. أعامل الناس كويس(( والله بحاول فيها على قدر الإمكان وربنا يعيني )) علشان يعرفوا أن الإسلام كويس مش وحش 

الرابع .. أتقي الله في شغلي مستقبلا .. على خيرة الله 

___ لو استجد جديد هكتبه إن شاء الله 

شكرا تاني يا عاشقة 

أحبك في الله

مهازل التعليم الخاص ...

طبعا الكل مؤخرا شاف المهازل اللي بتحصل في التعليم العالي
يعني إحنا لما صدقنا نسيب مشكلة الثانوية العامة ولقينا مشكلة الجامعات الخاصة اللي طلعت منين... الله أعلم ..

المشكلة دي خطيرة جدا ومحدش واخد باله منها 
تكمن المشكلة كلها في إن الكليات والمعاهد الخاصة ليها حد أدني للدخول فيها والتقديم للقبول في الدراسة فيها 
الحد الأدني ليها ممكن يقل عن الكليات الحكومية من 10 _ 15 % من تنسيق الثانوية العامة العادية 


ماشي سيبك من دي ..


لما يطلب أن المتقدم للكلية أو المعهد الفلاني لازم يبقي معاه مبلغ معين .. لا يقل عن 10 آلاف في السنة علشان الواد الغلبان يتعلم في كلية محترمة ويبقي معاه شهاده كويسة 
من غير حاجة كمان ..
يعني ممكن يبقي واحد جايب 80 % ومتقدم لدخول كلية معينة وواحد تاني جايب 85 % برده والأتنين متقدمين لكلية معينة والأولاني يتقبل بس علشان حكاية الأقدمية في التقديم .. يعني لو قدمت الأول تدخل الكلية ولو أتأخرت يبقى يعوض ربنا عليك


سيبك برده من دي 

لما الطالب يدخل كلية الهدف الرئيسي منها الترفيه للطالب ...
وبرأي أحد الأشخاص ...تعليم فندقي .. يعني تعليك هاي كلاس 


برده سيبك من دي وخليك في اللي جاي كدة ..

لما يقولك أن الطالب يبقي داخل الكلية أو العهد وو قاعد حاطط رجل على رجل ياخد 60 % من المجموع الكلي للدرجات في أول سنة وفي كل سنة 

يعني ناجح ناجح
ولو مجرد نص مجهود وهتلاقيه جايب جيد جدا أو أمتياز 
ومش بعيد كمان بسوبر إمتياز كمان

والمصيبة أنهم يقولولك أن الواد الغلبان عنده كورس صيفي .. واللي عرفته مؤخرا أن الكورس الصيفي دة للي بيبقوا شايلين مواد ويبعيدوها في الصيف .. شفتوا المصيبة 

وطالب تاني متخرج من كلية هندسة خاصة برده بيقول .. ممكن فيه ناس ميعرفوش حاجة في أي حاجة ويبقوا متخرجين من الكليات دي وبيقولوا إبننا باشموهندس قد الدنيا ...


يا سلاااااااااااااااام



طيب بقي ينفع كدة؟

يعني المتخرج برده من الكليات دي ياخد مكان واحد تاني متخرج من كلية تانية عادية حكومية ..؟

مع إن الإتنين ليهم نفس التقدير ونفس الدراسة ..