الجمعة، 19 سبتمبر 2008
أبوَّة مقنعة ..
فيه شيء محيرني أوي أوي ..
فيه آباء بيبقي مسافر برا بلدهم .. وبيسيب أولادهم في البلد اللي هما مقيمين فيه .. أحياناً بيسيبوهم مع زوجاتهم .. وأحيانا بيبقي لوحدهم أو مع أهل الأب أو أهل الأم ...
وقتها الأب مش بيفكر إلا في نقطة واحدة بس ..
القرش .. أو لقمة العيش ..
طيب يا سيدي الفاضل .. بعدما عملت اللي أنت عايزة وكوشت على فلوس كتير أو حتى مجمعتش مش فارقة .. ممكن تجاوب على سؤال لو سمحت ......
أنت بعد العمر دة كله ... شايف تعامل أولادك معاك إزاي؟؟!!!
طبعا مش عارف تجاوب ...
للأسف أنا أجاوبك ..
أولادك بيبصولك نظرة واحدة بس.. أنك مصدر القرش اللي هما بياخدوه .. أو مصدر الفلوس .. غير كدة مفيش
لأن وبمنتهي البساطة .. حضرتك مربيتهمش .. ومتعرفش بيحبوا إيه أو بيكرهوا إيه؟؟
بكل بساطة .. أنت كانت كل معرفتك بيهم الفلوس اللي بتبعتهالهم في أول الشهر .. والتليفونات اللي بتقضيها تسألهم عاملين إيه؟...
ومهما كترت الإتصالات دي .. للأسف أنت متعرفهومش ..
بقي بالله عليك دي بقي أبوَّة ..
نسيت ... أيوة أيوة ... نسيت الشهر من كل سنة اللي أنت بتقضيه معاهم ...
صح .. علشان أبقي عادلة ..
بس بالله عليك.. مش كنت بتلاحظ أنهم بيعاملوك حاجة وبيعاملوا الناس القريبين اللي كانوا معاهم حاجة تانية ..
عمرك ما لاحظت دة ...؟!!!
يا قوة قلبك يا أخي ..
بجد أنا مش عارفة أقولك إيه!!!!
بس بجد نصيحة من بنت ليك ....حاول تجمع اللي أنت فرطت فيه السنين اللي فاتت وحاول كلامي ميكونش مجرد كلام والسلام وحاول يبقي نقطة بداية جديدة في حياتك وحياة ولادك ...
علشان هما بجد محتاجينك كأب .. ينصحهم ..
محتاجينك كصديق.... تسمعهم
محتاجينك كصاحب .... محتاجين حسَّك معاهم في حياتهم ..
فياريت متكونش أناني وفكر في عيالك ولو لمرة واحدة في حياتك
السبت، 6 سبتمبر 2008
وداع مؤقت وأرجو من الله ألا يكون الأخير ..
أنا مسافرة إن شاء الله النهاردة ...
ومش عارفة هغيب عنكم أد إيه .
بس اللي أعرفه كويس أنكم هتوحشوني جدا .. وعمري ما هنساكم ..
وربنا يكرمكم يا أحلى أخوات عرفتهم في حياتي كلها ..
ربنا يجمعني بيكم على خير إن شاء الله
أستودعكم الله الذي لا تضيع ودائعه
في أمان الله
لا إله إلا الله
الأربعاء، 3 سبتمبر 2008
بااااااااااااك تاني للتدوين
الجمعة، 22 أغسطس 2008
تاج من حبيبتي في الله...
التاني:- أشتغل في السعودية إن شاء الله يا رب العالمين سنة أو سنتين بالكتير أوي وأرجع تاني مصر
الأول :- كنت أتمني أن جدي (( والد ماما )) كان يبقي موجود .. كان بيقولوا عليه واحد تقي ويعرف ربنا كويس ..وعمره ما أتقال في حقه كلمة وحشة .. ويكفي أن أي حد يفتكره بيقول الله يرحمه ..
الأربعاء، 6 أغسطس 2008
مهازل التعليم الخاص ...
طبعا الكل مؤخرا شاف المهازل اللي بتحصل في التعليم العالي
يعني إحنا لما صدقنا نسيب مشكلة الثانوية العامة ولقينا مشكلة الجامعات الخاصة اللي طلعت منين... الله أعلم ..
المشكلة دي خطيرة جدا ومحدش واخد باله منها
تكمن المشكلة كلها في إن الكليات والمعاهد الخاصة ليها حد أدني للدخول فيها والتقديم للقبول في الدراسة فيها
الحد الأدني ليها ممكن يقل عن الكليات الحكومية من 10 _ 15 % من تنسيق الثانوية العامة العادية
ماشي سيبك من دي ..
لما يطلب أن المتقدم للكلية أو المعهد الفلاني لازم يبقي معاه مبلغ معين .. لا يقل عن 10 آلاف في السنة علشان الواد الغلبان يتعلم في كلية محترمة ويبقي معاه شهاده كويسة
من غير حاجة كمان ..
يعني ممكن يبقي واحد جايب 80 % ومتقدم لدخول كلية معينة وواحد تاني جايب 85 % برده والأتنين متقدمين لكلية معينة والأولاني يتقبل بس علشان حكاية الأقدمية في التقديم .. يعني لو قدمت الأول تدخل الكلية ولو أتأخرت يبقى يعوض ربنا عليك
سيبك برده من دي
لما الطالب يدخل كلية الهدف الرئيسي منها الترفيه للطالب ...
وبرأي أحد الأشخاص ...تعليم فندقي .. يعني تعليك هاي كلاس
برده سيبك من دي وخليك في اللي جاي كدة ..
لما يقولك أن الطالب يبقي داخل الكلية أو العهد وو قاعد حاطط رجل على رجل ياخد 60 % من المجموع الكلي للدرجات في أول سنة وفي كل سنة
يعني ناجح ناجح
ولو مجرد نص مجهود وهتلاقيه جايب جيد جدا أو أمتياز
ومش بعيد كمان بسوبر إمتياز كمان
والمصيبة أنهم يقولولك أن الواد الغلبان عنده كورس صيفي .. واللي عرفته مؤخرا أن الكورس الصيفي دة للي بيبقوا شايلين مواد ويبعيدوها في الصيف .. شفتوا المصيبة
وطالب تاني متخرج من كلية هندسة خاصة برده بيقول .. ممكن فيه ناس ميعرفوش حاجة في أي حاجة ويبقوا متخرجين من الكليات دي وبيقولوا إبننا باشموهندس قد الدنيا ...
يا سلاااااااااااااااام
طيب بقي ينفع كدة؟
يعني المتخرج برده من الكليات دي ياخد مكان واحد تاني متخرج من كلية تانية عادية حكومية ..؟
مع إن الإتنين ليهم نفس التقدير ونفس الدراسة ..
الاثنين، 28 يوليو 2008
عبارة المـــــــــــــــــــــــــــوت
كلام خفيف في السياسة
أحنا هنا هنتكلم في السياسة ..
والغريب بردة إن لما أي حد بييجي يقولك سياسة تلاقي كل واحد أخد ديله في سنانه وجري ..
دة عادي ..
وبعدين الكلام في السياسة بقي موضة العصر ..
هو وبصراحة الكورة ..
وخاصة بقي لما يبقي ماتش زي الأهلي والزمالك كدة .. يا ماشاء الله
تلاقي الناس كلها بتتفرج على الكورة
وهيـــــــــــــــــــــــــــــــــــــــــــــــه
الأهلي كسب
الأهلي عمهم ..
الأهلي عمهم وحابس دمهم
طيب لما تيجي تسألهم معاكم طيب تمن أنكم تشتروا عشا وأنتوا راجعين البيت لاهلكم ولا لأ..
والأغلب مش بيبقي معاهم إنهم يشتروا عيش حاف بس وبرده بيقولوا الأهلي عمهم وحابس دمهم
وأرقص يا حضري وألعب يا أبو تريكة
بعد الكلام الكتير ومهما أتكلمنا برده هتلاقي إن حاجات كتير أوي الحكومة بتضحك بيها على الشعب الغلبان علشان يا عيني يتلخم في الدنيا دي ويبطل كلام في السياسة اللي في الأغلب لا هيودي ولا هيجيب..
ويسكتوا أحسن ويسيبوا الناس اللي بتفهم في السياسة وتسيبهم يشوفوا شغلهم في تضليل الشعب ونهب أمواله وتخزينها في البنوك السويسريه ....
وفي الأخر ..
وأنا مالي يا عم ..
حد الله بيني وبين السياسة ..
سياسة إيه بس يا عمي .. دانا حتي مش بعرف أنطقها تقولي سياسة ..
للأسف هو دة الحال
الأحد، 20 يوليو 2008
أنك تسمع غيرك .. دة لوحده فن :)
ليه دايما في خلاف دايم؟
ليه بمجرد كلمتين من الاهل بيتحول الموضوع من مجرد كلام لجدال وممكن يتحول الموضوع بخناقة وسيبان للبيت كمان؟
ليه لما أي واحد فينا يغلط والأهل أو أي حد يكبرنا سنا يحاول ينصحنا بنحاول نظهر أننا إحنا الصح ومحدش غلطان وكإننا بقينا خلاص معصومين؟
ليه لما يبقى فيه اجتماع عائلي الواحد بيحاول يهرب منه ويقعد مع أصحابه سواء بقي يخرج معاهم ... يكلمهم على الموبايل أو يدخل معاهم الشات... أهم حاجة يهرب والسلام؟
ليه برده في الأعياد يتكرر نفس الموضوع والواحد يخرج من صباحية ربنا ويحاول يخرج من المود اللي ممكن الأهل يحطوه فيه بمجرد تجمع ظريف في العيد الواحد بيتهرب بأي وسيلة مهما كانت ساذجة؟
لو الواحد بقي قعد مع نفسه كدة في لحظة رواقة وسأل نفسه سؤال :-
هما ليه بابا وماماوأخواتي الكبار بيعملوا فيا كدة؟
ليه دايما بيحاولوا يبينولي مهما كبرت إني لسه صغير ومش فاهم حاجة ... وشوية وهيدوني المصاصة في بقّي؟
ليه أحيانا كتير أوي بحاول اني أوصلهم أنا عايز إيه ومحدش فاهم حاجة؟
ليه لما بحاول اتقرب منهم بلاقي كل محاولة تقلب بخناقة ومصيبة في البيت وفي الأخر بقعد في أوضتي لوحدي وأقعد أفكر؟
طيب ليه لما أنا بغلط بيحاولوا يبينوا أد إيه أنا صغير ولا يعتمد علي؟
لا والأكتر كل واحد بيحاول يجتهد في حل المشكلة بتاعتي وفي الأصل أنا لو قعدت لوحدي في روقان بردة هجيب الحل الأمثل ليها ؟
طيب حاجة تانية ...
لما مشكلة مثلا في المجتمع وبيتاخد رأي الكل في الكلام .... ييجي أنت كلامك ويقف في الزور؟
هنا بقي والواحد لازم يقف .......
من اللي فات كله لقيت إن مفيش حاجة اسمها استماع للأخر
فن الانصات للأخرين انعدم في ظل التطورالعلمي الرهيب اللي المفروض يوصل بالبشرية إلى حدود الكمال ....
في نفس الوقت اللي بنعاني فه إحنا الشباب من انعدام وجود الأسر والتوحد الأسري
بل بالعكس ..
انتشر عندنا حالات من التوحد _ يعني _ كل شخصية بتحاول تقفل على نفسها الباب وبتخفي أجمل ما فيها من صفات عن أقرب الناس ليها؟
ليه ؟!!!!
بجد ليه؟!!!
الأربعاء، 16 يوليو 2008
ثانوية عامة بدون ثانوية عامة...... جديدة دي!!!
والشكوى في الأغلب جت من طلاب علمي رياضة اللي كانت الإمتحانات عندهم فـــــوق الوصف .. وبيقولوا أن الأمتحانات كانت أكتر من كونها وحشة وفوق مستوي الطالب المتوسط بمراحل كتيـــــــرة ..
بما أن النتيجة ظهرت .. يبقي الكلام في الأمتحانات عديم الفايدة
الأحد، 13 يوليو 2008
_-"*فن عزل النفس عن الوسط المحيط*"-_
لما الواحد بيبقي مخنوق جدا جدا بيعمل إيه؟
فيه حاجات كتير أوي بتتعمل وقت الزعل أو العصبية
منها على سبيل المثال أولا أن الواحد المتدين بيرجع لربنا ويقعد يدعي كتير جدا أن ربنا يفرج عنه همه
والتاني بيلجأ إلى ربنا بالقرآن وقراءته مثلا لسورة (((( يوسف )))))
فيه ناس بقي غير دول خالص...
فيه ناس لما بتزعل بتقوم مثلا حاجزة نفسها في أوضتها وتصفي حساباتها لوحدها بدون مساعدة حد نهائي .... وفي الفترة دي هي بتفضل أن محدش يزعجها نهائي حتى لو كان مين من أهلها ... وبيفضلوا الإعتصام في أوضهم على حسب كبر الموضوع اللي عايزين يصفوا فيه
وناس تانية خالص ...فيه ناس لما تحس أن الدنيا قفلت في وشهم بيروحوا يسمعوا أغاني ما يعلم إلا ربنا بيها ... بتحاول أنها تطلع من المود الكئيب اللي هيا فيه بأنها تحط نفسها في مود أكئب من اللي قبله علشان تقدر تطلع منه ... وللأسف ... طريقة فاشلة بكل المعاني
أما بقي ناس لما بتحس أنها على وشك يحصل معاها دور كئابة .... بتتصل بأصحابها على طول وبدون تردد وتقعد ترغي معاهم .... مش وحشة الطريقة دي .... على الأقل تحس أنك مش في الدنيا دي لوحدك
وناس تانية بقي لما بتمر بموقف سخيف بتقوم مكبرة الموضوع دة و (((( عامله من الحبة قبة ))))) والغريب أنها تقوم شايله في نفسها ...
موقف ورا التاني ورا التالت .... وفي الآخر تنفجر .... وللأسف أنها بتنفجر في أقرب الناس ليها وقتها ... حتى مبتفكرش أنها ممكن تخسر الناس دول في الزهق والعصبية اللي هيا فيهم دي .... وبتيجي تعتذر بعدما الدنيا تكون باظت ..... طريقة مش نافعة
خالص ...خليك أكتر اجتماعية
أنا حاولت أني جمع أكتر عدد من الحالات اللي ممكن تحصل في حياتنا اليومية من الزعل
لو جينا بقي ناخد جانب العصبية .... هتلاقي الوضع ممكن يختلف شوية على حسب طبيعة كل شخص وعلى حسب تقبله للموضوع من الأساس
الناس الأولانية .... لما تتعصب ... بتلجأ لربنا فورا .. وبدون تأخر
وناس تانية بتكظم الغضب بتاعها .... بس نصيحة ... اللي بيكظم الغضب بتاعه متوصلهوش لأكتر من مرة لحالة من الزهق لأنك مش هتعرف ردة فعله إيه؟ِِِِِِِِ
وناس تانية بيخبطوا إيديهم في الجدران ... اعتقادا منهم أنهم بالطريقة دي ممكن يطلع من الموقف اللي هو فيه
وناس تانية بتقوم و(((( تشق الجيوب )))) يعني تقطع الهدوم اللي لابساها ....وهو محرم شرعا
بردة أنا حاولت أني أقول حالات كتير منها بتحصل في حياتنا اليومية
بس لو مثلا كنت متضايق أو متعصب .... هتكون أي واحد من
الحالات اللي فوق؟!!!!