عبارة المـــــــــــــــــــــــــــوت

عيب أوي علينا لما نعتبر إننا في بلد ديمقراطي ونسمح لواحد كلب زي ممدوح اسماعيل إنه يقضي على حياة 1033 راكب من ركاب العبارة المشئومة دي .. العبارة 98 ..

والله حرام بجد الناس دي كلها تموت ..

أنا عارفة أن الموت علينا حق ..

بس عيب أوي أن واحد زيه يقتل عدد كبير من الناس دول بدون ما ياخد عقاب يجازى عليه 

والأدهي والأمر أن القاضي يقول براءته ويبرأه من كل التهم الموجهه ليه .. ويتقبض على كابتن عبارة سانت كاترين اللي نبهت الناس إن فيه عبارة بتغرق في الأساس..

طيب غلط الراجل دة أن حاول ينبههم وينقذ النس ويقولهم أن فيه عبارة بتغرق..

ولا غلط علشان نبه إن فيه مصايب هتحصل بسبب إهمالهم وسوء إدارتهم للشركة 

بجد اللي الواحد يقدر يقوله 

حسبي الله ونعم الوكيل 

حسبي الله ونعم الوكيل 

حسبي الله ونعم الوكيل

كلام خفيف في السياسة

دستور يا سيادنا...
أحنا هنا هنتكلم في السياسة ..
والغريب بردة إن لما أي حد بييجي يقولك سياسة تلاقي كل واحد أخد ديله في سنانه وجري ..
دة عادي ..
وبعدين الكلام في السياسة بقي موضة العصر ..
هو وبصراحة الكورة ..
وخاصة بقي لما يبقي ماتش زي الأهلي والزمالك كدة .. يا ماشاء الله 
تلاقي الناس كلها بتتفرج على الكورة 
وهيـــــــــــــــــــــــــــــــــــــــــــــــه 
الأهلي كسب 
الأهلي عمهم ..
الأهلي عمهم وحابس دمهم 

طيب لما تيجي تسألهم معاكم طيب تمن أنكم تشتروا عشا وأنتوا راجعين البيت لاهلكم ولا لأ..
والأغلب مش بيبقي معاهم إنهم يشتروا عيش حاف بس وبرده بيقولوا الأهلي عمهم وحابس دمهم 
وأرقص يا حضري وألعب يا أبو تريكة 

بعد الكلام الكتير ومهما أتكلمنا برده هتلاقي إن حاجات كتير أوي الحكومة بتضحك بيها على الشعب الغلبان علشان يا عيني يتلخم في الدنيا دي ويبطل كلام في السياسة اللي في الأغلب لا هيودي ولا هيجيب..
ويسكتوا أحسن ويسيبوا الناس اللي بتفهم في السياسة وتسيبهم يشوفوا شغلهم في تضليل الشعب ونهب أمواله وتخزينها في البنوك السويسريه ....
وفي الأخر ..
وأنا مالي يا عم ..
حد الله بيني وبين السياسة ..
سياسة إيه بس يا عمي .. دانا حتي مش بعرف أنطقها تقولي سياسة ..

للأسف هو دة الحال

حالة سايدة الكل من الخوف والجبن اللي بيشربوولنا في المدارس وفي التليفزيونات وفي أي حته تانية 

للأسف جبن وخوف 

من مين ؟

مش عارفة الصراحة

أنك تسمع غيرك .. دة لوحده فن :)

ليه أحنا الشاب في مشاكل دايما مع العائلات بتاعتنا؟
ليه دايما في خلاف دايم؟

ليه بمجرد كلمتين من الاهل بيتحول الموضوع من مجرد كلام لجدال وممكن يتحول الموضوع بخناقة وسيبان للبيت كمان؟

ليه لما أي واحد فينا يغلط والأهل أو أي حد يكبرنا سنا يحاول ينصحنا بنحاول نظهر أننا إحنا الصح ومحدش غلطان وكإننا بقينا خلاص معصومين؟

ليه لما يبقى فيه اجتماع عائلي الواحد بيحاول يهرب منه ويقعد مع أصحابه سواء بقي يخرج معاهم ... يكلمهم على الموبايل أو يدخل معاهم الشات... أهم حاجة يهرب والسلام؟

ليه برده في الأعياد يتكرر نفس الموضوع والواحد يخرج من صباحية ربنا ويحاول يخرج من المود اللي ممكن الأهل يحطوه فيه بمجرد تجمع ظريف في العيد الواحد بيتهرب بأي وسيلة مهما كانت ساذجة؟

لو الواحد بقي قعد مع نفسه كدة في لحظة رواقة وسأل نفسه سؤال :-
هما ليه بابا وماماوأخواتي الكبار بيعملوا فيا كدة؟

ليه دايما بيحاولوا يبينولي مهما كبرت إني لسه صغير ومش فاهم حاجة ... وشوية وهيدوني المصاصة في بقّي؟

هما ليه مبيسمعونيش؟
ليه أحيانا كتير أوي بحاول اني أوصلهم أنا عايز إيه ومحدش فاهم حاجة؟

ليه لما بحاول اتقرب منهم بلاقي كل محاولة تقلب بخناقة ومصيبة في البيت وفي الأخر بقعد في أوضتي لوحدي وأقعد أفكر؟
طيب ليه لما أنا بغلط بيحاولوا يبينوا أد إيه أنا صغير ولا يعتمد علي؟

لا والأكتر كل واحد بيحاول يجتهد في حل المشكلة بتاعتي وفي الأصل أنا لو قعدت لوحدي في روقان بردة هجيب الحل الأمثل ليها ؟

طيب حاجة تانية ...
لما مشكلة مثلا في المجتمع وبيتاخد رأي الكل في الكلام .... ييجي أنت كلامك ويقف في الزور؟

هنا بقي والواحد لازم يقف .......

من اللي فات كله لقيت  إن مفيش حاجة اسمها استماع للأخر 

فن الانصات للأخرين انعدم في ظل التطورالعلمي الرهيب اللي المفروض يوصل بالبشرية إلى حدود الكمال ....

في نفس الوقت اللي بنعاني فه إحنا الشباب من انعدام وجود الأسر والتوحد الأسري 
بل بالعكس ..

انتشر عندنا حالات من التوحد _ يعني _ كل شخصية بتحاول تقفل على نفسها الباب وبتخفي أجمل ما فيها من صفات عن أقرب الناس ليها؟

ليه ؟!!!!

بجد ليه؟!!!

ثانوية عامة بدون ثانوية عامة...... جديدة دي!!!

من يومين كدة نتيجة الثانوية العامة ظهرت في مصر

ولأول مرة في حياتنا منعرفش أن النتيجة ظهرت إلا بعدها بيوم كامل وبالصدفة الباحته..

والغريب أننا دايما كنا بنعرف من وسائل الأخبار والقنوات الإعلامية..

المرة دي غيــــــــــر ..

دونا عن أي مرة قبل كدة .. الأمتحانات السنة دي كانت مفاجئة جدا والأكتر أن طلبه أنتحروا كتير وتعددت الطرق اللي انتحروا بيها .. منها مثلا طالب شنق نفسه والتانية بنت أخدت أدوية كتير وهيا متفوقة جدا .. بس بنقول لمين ..

والكلمة اللي بتتردد على ألسنة أولياء الأمور من أول ما الإمتحانات أبتدت هيا """ حسبي الله ونعم الوكيل """

لأن بجد هما مش هيعرفوا يعملوا حاجة غير اللي عملوه ..

لما طلاب بيقولوا للناس إحنا أخدنا دروس بحوالي 20 أو 30 ألف في السنة .. ليه يعني؟
والشكوى في الأغلب جت من طلاب علمي رياضة اللي كانت الإمتحانات عندهم فـــــوق الوصف .. وبيقولوا أن الأمتحانات كانت أكتر من كونها وحشة وفوق مستوي الطالب المتوسط بمراحل كتيـــــــرة ..
بما أن النتيجة ظهرت .. يبقي الكلام في الأمتحانات عديم الفايدة

في برنامج العاشرة مساءاً واللي بتقدمه المذيعة منى الشاذلي .. كان التقرير اللي عملته مراسلة البرنامج غريب جدا ..

هما رصدوا الحالات من قدام أحد المدارس الثانوية ..

وكل الطلاب او الأغلب الطالبات اللي أخدوا رأيهم في النتيجة كانوا من أدبي وكانت مجاميعهم تتراوح من 82 للأغلب والأقلية منهم بل واحدة تقريبا هيّ اللي تعدت النسبة وبقت أعلى من الـ 90 بدرجات..

طيب سؤال هنا بقي...

هيا الثانوية العامة توقفت عند مرحلة الثانوية العامة للقسم الأدبي دون الأهتمام بالقسم العلمي نهائي أو تجاهله ..

ولا بقي بيحاولوا يخففوا مصيبة الثانوية العامة في القسم العلمي بأنهم ينشروا أخبار القسم الأدبي في كل الجرايد والقنوات الإخبارية ..

غم كدة .. فيه بعض أولياء الأمور من ميسوري الحال قدروا أنهم يتصلوا بالمذيعة منى الشاذلي ويقولولها أن اللي حصل السنة دي في الأمتحانات مهزلة بكل المقاييس

وكان تعليق أحد طلاب السنة النهائية في كلية الهندسة .. أن اللي بيحصل في الثانوية العامة خطأ جامد جدا .. لأنه مينفعش تيجي تحاول تصلح في التعليم من نص الهرم .. عايز تصلح فيه صح يبقي لازم عليك تبدأ الهرم من أوله .. يعني من أول أبتدائي أو أقل كمان وأنت طالع ..

وفيه والدة أحد الطالبات في الثانوية العامة .. بتقول بنتها تعبت جدا جدا جدا .. وانهارت بعد النتيجة .. فأنا هكافئها وأدخلها كليه خاصة ..

طيب بالله عليكو .. إحنا في مصر عندنا القدرة على أن أي ولي أمر يقدر يدخل أبنه في كلية خاصة في الفترة الحالية ..

وخاصة تبقي الكليات الخاصة في حد ذاتها الشهادات نفسها معترف بيها ولا هيخرج يلاقي مكانه محجوز على الرصيف جنب الخريجين ... 

بجد بقت الثانوية العامة في الفترةالحالية ... ثانوية غامة

_-"*فن عزل النفس عن الوسط المحيط*"-_

لما الواحد بيبقي مخنوق جدا جدا بيعمل إيه؟

فيه حاجات كتير أوي بتتعمل وقت الزعل أو العصبية

منها على سبيل المثال أولا أن الواحد المتدين بيرجع لربنا ويقعد يدعي كتير جدا أن ربنا يفرج عنه همه 

والتاني بيلجأ إلى ربنا بالقرآن وقراءته مثلا لسورة (((( يوسف )))))

والتالت أن الواحد مبيستحملشي اللي بيحصله دة .... وبيقعد يبكي كتير جدا....

فيه ناس بقي غير دول خالص...

فيه ناس لما بتزعل بتقوم مثلا حاجزة نفسها في أوضتها وتصفي حساباتها لوحدها بدون مساعدة حد نهائي .... وفي الفترة دي هي بتفضل أن محدش يزعجها نهائي حتى لو كان مين من أهلها ... وبيفضلوا الإعتصام في أوضهم على حسب كبر الموضوع اللي عايزين يصفوا فيه 

وناس تانية خالص ...

فيه ناس لما تحس أن الدنيا قفلت في وشهم بيروحوا يسمعوا أغاني ما يعلم إلا ربنا بيها ... بتحاول أنها تطلع من المود الكئيب اللي هيا فيه بأنها تحط نفسها في مود أكئب من اللي قبله علشان تقدر تطلع منه ... وللأسف ... طريقة فاشلة بكل المعاني

أما بقي ناس لما بتحس أنها على وشك يحصل معاها دور كئابة .... بتتصل بأصحابها على طول وبدون تردد وتقعد ترغي معاهم .... مش وحشة الطريقة دي .... على الأقل تحس أنك مش في الدنيا دي لوحدك

وناس تانية بقي لما بتمر بموقف سخيف بتقوم مكبرة الموضوع دة و (((( عامله من الحبة قبة ))))) والغريب أنها تقوم شايله في نفسها ... 
موقف ورا التاني ورا التالت .... وفي الآخر تنفجر .... وللأسف أنها بتنفجر في أقرب الناس ليها وقتها ... حتى مبتفكرش أنها ممكن تخسر الناس دول في الزهق والعصبية اللي هيا فيهم دي .... وبتيجي تعتذر بعدما الدنيا تكون باظت ..... طريقة مش نافعة 
خالص ...خليك أكتر اجتماعية

 أنا حاولت أني جمع أكتر عدد من الحالات اللي ممكن تحصل في حياتنا اليومية من الزعل 

لو جينا بقي ناخد جانب العصبية .... هتلاقي الوضع ممكن يختلف شوية على حسب طبيعة كل شخص وعلى حسب تقبله للموضوع من الأساس

الناس الأولانية .... لما تتعصب ... بتلجأ لربنا فورا .. وبدون تأخر 


وناس تانية بتكظم الغضب بتاعها .... بس نصيحة ... اللي بيكظم الغضب بتاعه متوصلهوش لأكتر من مرة لحالة من الزهق لأنك مش هتعرف ردة فعله إيه؟ِِِِِِِِ

وناس تانية بيخبطوا إيديهم في الجدران ... اعتقادا منهم أنهم بالطريقة دي ممكن يطلع من الموقف اللي هو فيه 

وناس تانية بتقوم و(((( تشق الجيوب )))) يعني تقطع الهدوم اللي لابساها ....وهو محرم شرعا 

بردة أنا حاولت أني أقول حالات كتير منها بتحصل في حياتنا اليومية 


بس لو مثلا كنت متضايق أو متعصب .... هتكون أي واحد من 
الحالات اللي فوق؟!!!!